Sa është i nevojshëm digjitalizimi i Shërbimit të Studentëve

Unë personalisht mendoj që një universitet siç është Universiteti i Prishtinës duhet që sa më parë të ketë një sistem të digjitalizuar për nevojat e studentëve. Mendoj që është absurde që UP si universitet që pretendon të jetë nën ombrellën e universiteteve europiane sot në kohën e kulminacionit të zhvillimit tekonologjik të mos ketë një sistem që do t'ua lehtësonte studentëve nevojat e tyre, nëse jo më shumë, sikur të ekzistone ky shërbim elektronik, studentët do ta shfrytëzonin për mësim kohën, që nuk është e shkurtë, të cilën duhet shpenzuar për t'u informuar me ndonjë ndryshim të mundshëm të orarit të ligjeratave, apo të datës së provimit, apo të afateve për regjistrim të semestrit dhe paraqitjes së provimeve, e mos të flasim për kohën disa orëshe e disa ditore për pritje në rradhë të gjata për procedurat administrative pranë mini-dritareve të referentëve për t'i kryer punët e lartëpërmendura.
Duhet theksuar se ky është mendimi im por nuk është thjeshtë një hamendje apo ëndërr e parealizueshme. Sistemet e tilla ekzistojnë pothuaj në të gjitha universitetet bashkëkohore. Vlenë të ceket që edhe një prej universiteteve private brenda Kosovës posedon me një sistem të tillë dhe një sistem i tillë është i realizueshëm si nga ana teknike ashtu edhe nga ana financiare.